Бабіна лета

“Сямён лета выпраўляе, бабіна лета наводзіць”. 14 верасня па народным календары – Сямён-летаправодзец, першыя асяніны, першая сустрэча восені, менавіта з яго і пачынаецца Бабіна лета. Скончылася летняя страда, пачынаюцца гаспадарчыя работы ў хаце, на двары. Апошнія цёплыя дзянькі традыцыйна адзначаліся народным гуляннем. Творчы калектыў Полацкага раённага Цэнтра культуры завітаў у аграгарадок Новыя Гараны, каб зладзіць тэатралізаваны абрад “Бабіна лета”, успомніць традыцыі, народныя прыкметы нашых прадзедаў, зрабіць змову на хараство, моц і здароўе ды адсвяткаваць гэты дзень дружным карагодам

Яблычны маршрут па Полацкім раёне

Добрай традыцыяй для творчага калектыву Полацкага РЦК стаў “Яблычны маршрут” па Полацкім раёне на “Яблычны Спас”. Першай лакацыяй на святочным маршруце стала сядзіба Рымскіх-Корсакавых, дзе творчыя калектывы філіяла 14 Астроўшчынскага СДК пазнаёмілі ўдзельнікаў свята з мясцовымі традыцыямі яго правядзення. Перамясціўшыся на другую лакацыю, маладыя хлопцы і дзяўчаты з раённага Цэнтра культуры размясціліся на прыгожым убраным полі, дзе правялі асаблівыя тэатралізаваныя абрады: “Праводзіны лета” ды “Сустрэча восені”. Па полацкай традыцыі, моладзь прыйшла дзякаваць лета і сонейка за добрае надвор’е, багаты ўраджай ды сытую надыходзячую зіму з дарамі гэтага лета: садавіна, агародніна, зерне і канешне першыя яблычкі новага ўраджаю